التطرف

السلام عليكم انا اخوكم مهاب عمرى مافكرت اكتب فى المنتدى الاسلامى لكن انا متضايق من حاجات كتير فى المجتمع بتاعنا
وحبيت اكلمكم عنها وياريت اسمع رأيكم

عايزك تمشى فى الشارع من عشر سنين وتعد عدد المنقبات اللى فى الشارع وتنزل دلوقتى وتعدهم برضه وشوف الفرق المهول اللى هاتلقيه بين الرقمين (لو سمحتوا اقرأوا للاخر)
عايزك تعد عدد اللى ماشى وملتحى وتبقى مشغل اغانى ولا حاجة ييجى يقلك حرام ومش عارف ايه واما تسأله عن دليل يجيبلك الف واحد ولو غلط هو يجبلك الف دليل على ان غلطه احتمال مايبقاش غلط او ان الضرورات تبيح المحظورات أو أو أو.....................

التدين حاجة جميلة لكن اللى بيحصل ده مش تدين لكن تطرف يعنى هيحصل ايه لو الواحدة لابسة حجاب او هدوم محتشمة وماشية فى الشارع , وهيحصل ايه لو الواحد حلق دقنه وبقى شكله نطيف ومحترم قدام الناس ويبقى هو وهى برضه ملتزمسن وبيصلوا وبيصوموا.

لو جيت بصيت لامى وامك ومعظم امهاتنا من الجيل القديم هتلاقى معظمهم ما كانوش لا منقبات ولا يمكن حتى محجبات
-الكلام ده قبل ما يطرأ علينا فجأة موضوع التطرف- والحمد لله احنا كلنا متربيين كويس وبنعرف ربنا.

انا اللى مضايقنى ان الناس فى الغرب قاعدين يتقدموا كل يوم والواحد يسمع عن اختراعات غريبة بيعملوها فى النشرة ويقول ياااااااااه اشمعنى احنا ماعندناش الحاجات دى.
لكن احنا لسه بنفكر الاغانى حرام ولا لأ ولا حلاقة الدقن سنة ولا فرض والست لو خصلة بانت من شعرها تبقى اثمة ولا ايه .

انا مابقولش الواحد يتخلى عن دينه ولا هويته لكن الواحد لازم يكون متفتح مش كل همه و برنامجه اليومى يقصره على العبادة الرسول -صلى الله عليه وسلم- قال:اعمل لدنياك كأنك تعيش ابدا واعمل لاخرتك كأنك تموت غدا.

وفى قصة مشهورة عن عمر بن الخطاب انه كل اما يروح الجامع يلاقى راجل قاعد فيه مابيعملش حاجة غير الاعتكاف والصلاة وقرأة القران , فسأله فى يوم : من يعولك؟ قال له:أخى فأنا متفرغ للعبادة.
تخيلوا عمر بن الخطاب-رضى الله عنه- ضربه وقال له انه لازم يشتغل وان الحياة مش عبادة بش واعتكاف وانما عمل والواحد لازم يستمتع بيها والا ربنا ماكانش خلق الحاجات الحلوة -الحلال- عشان نستمتع بيها.

انا عارف ان كتير منكم هيقول ده منفلت ومش عارف ايه لكن حبيت اقول رأى ياريت نسمع اراؤكم.

أخوكم مهاب